Ch'ti : Fable de la Fontaine

Une fable de la Fontaine quelque peu remaniée par les gens du Nord

El monier, sin garchon et l’baudet

J’ai lu edans l’brideux qu’un monier yé s’garchon
Pour ervend’leu baudet s’en alleuent au marché.
Pou qu’i’ paraisse pus biau, yé soye moins fatigué
I’s y louyèrent les pattes et pis d’sus un bâton
S’mirent en tête d’el porter comme pour eun procession.
En les veyant passer, d’iavot un qui criot :
«Oui, c’est cha l’ord’ nouveau, c’est l’homme qui fait l’quéviau».
Intindant cha, l’monier dit tout bas à s’garchon
C’t homm’ là a ben raison, l’baudet peut co’ gambier,
On n’doit mi pus l’porter, r’mettons lé su’ ses fers.
L’baudet pou s’pourméner préférot l’aut’ manière.
Le vlà qui s’met à braire, à s’plaind’yé à ruer.
L’monier n’ s’en occupe nin, i fait monter s’gamin,
Yé li march’ à leu suite. Mais d’sus ces entrefaites;
Arrivent trois gros censiers «Ah ! qu’la vie est miau faite
Qui s’récrie el pus vieux, les jont’s n’respectent pus ren
Desquindez, jon’ homme, yé layez vo’ vieux père
Monter edsus l’baudet ! V’ s’avez raison, Messieurs,
Es’ t’ a mi à monter, allez, desquind em geux !
En bon garchon qu’il est, l’pétit met pied à terre.
Mais nin chin met’s pus long, i’s rencont’nt des coumères
Qui commench’nt à s’fout’ d’eux, disant c’est nin honteux
Ed faire keurir ainsi un aussi biau p’tit fieu
Pendant qu’l’aut y s’prelasse, su’ s’mule comme no’Saint Père.
El monier i’ en r’dit eun, al coumère armet cha
Si bien qu’au bout du compte, l’monier croit s’êt’trompé,
I’ prind s’garchon en croup’ éyé fouett’ cocher.
Mais au bout tois minut’s eun troupe les arrêta.
«Mais vous êtes fous, mes gins, d’querquer ainsi c’baudet
A l’foire n’pourrez même pus tirer vingt sous de s’piau»
«Vos allez l’fait créver, qu’un aut’ i soumaquot
Tout c’que ‘s allez gagner, c’est d’ d’voir aller à pied !»
«L’ont ben raison tous deux, desquindez d’là allez...
Mon dieu qu’c’est compliqué ed continter tout l’mond’,
Qui berdélot l’monier, cha fait ren essayons
Ed trouver eun manièr’ pou les accommoder».
I’s desquind’nt tous les deux, pis suiv’nt leu baudet.
Un aut’ qui les croisot, yeu dit : «Bé c’est nouviau
El baudet s’erpous’rot, quand s’mait’ i’ s’fatigrot.
Vos conservez l’baudet, mais v’ s’usez vos souliers».
«J’sus p’têt’ pus âne qué li, qui dit monier en rach’,
Mais j’d’ai marre d’acouter tous les conseils qu’on donne.
Ed queq’ manière qu’on fait, cha n’plait nin à personne,
Met’nant, j’frais pus qu’a m’ mod’, pa’ biau temps ou l’orach’
Eq ça plass’ ou non, ej mont’rais d’sus m’baudet
Yé l’sien qui s’ra rogneux i’ n’ara qu’a s’gratter».


Bonne lecture

Morshak